सार्वजनिक उत्सवातील डीजेविरोधातकलावंत ट्रस्टची जनजागृती मोहीम

 

 

 

गणेशोत्सवासह सार्वजनिक उत्सवातील मिरवणुकांमध्ये डीजेच्या वाढत्या वापरामुळे ध्वनिप्रदूषण, शारीरिक हानीमुळे आता पुणेकरांमध्ये जनजागृतीसाठी कलावंत ट्रस्टने पुढाकार घेतला आहे. डीजेवर बंदी आणावी यासाठी येत्या रविवारी (14 सप्टेंबर) स्वाक्षरी मोहिमेचे आयोजन करण्यात आले आहे. पुणेकरांच्या स्वाक्षरीचे निवेदन मुख्यमंत्री देवेंद्र फडणवीस यांना देण्यात येणार असून, त्याद्वारे डीजेवर बंदी आणण्याची मागणी करण्यात येणार आहे. नुकत्याच झालेल्या गणेश विसर्जन मिरवणुकीत पुणेकरांनी डीजेचा दणदणाट अनुभवला. त्यामुळे स्थानिक रहिवाशांना, मिरवणुकीत सहभागी झालेल्या अनेकांना त्रास झाला.

 

या समस्यांबाबत पुणेकरांमध्ये जनजागृती करण्यासाठी; तसेच डीजेच्या वापरावर राज्य सरकारने बंदी आणावी, अशी मागणी आम्ही करीत आहोत. त्यासाठी स्वाक्षरी मोहीम आयोजित केली आहे, अशी माहिती कलावंत ट्रस्टचे अध्यक्ष सौरभ गोखले यांनी पत्रकार परिषदेत दिली. त्या वेळी ट्रस्टचे विश्वस्त आरती पाठक, मानस कुलकर्णी, पुष्कर कुलकर्णी आदी उपस्थित होते. कोणत्याही धार्मिक, सांस्कृतिक उत्सवांच्या मिरवणुका, महापुरुषांची जयंती, पुण्यतिथी या निमित्ताने मिरवणुका काढल्या जातात. शोभायात्रांमध्ये डीजे, डॉल्बीचा वापर करण्यास बंदी घालण्यात यावी. स्थानिक रहिवाशांना त्या आवाजाचा त्रास होऊ नये; तसेच शारीरिक हानी होणार नाही आणि वाहतूक कोंडी होणार नाही यासारखे प्रकार यामुळे टाळता येतील, अशी भूमिका गोखले यांनी स्पष्ट केली.

 

गोखले म्हणाले, व्होट बँकेच्या कारणास्तव सध्या सर्वत्र डीजे निर्बंधमुक्त करण्यावर भर दिला जात आहे. मात्र, त्याला नागरिकांनी विरोध केला पाहिजे. डीजेविरोधात नागरिकांनी आवाज उठविला पाहिजे, म्हणून आम्ही पुढे आलो आहोत. माझ्या व्हिडिओच्या पोस्टनंतर अनेकांनी मला संपर्क साधून आवाज उठवल्याबद्दल स्वागत केले आहे. डीजेबंदीबाबत नागरिकांनी आवाज उठवायला हवा. आपण बोललो तर अडचणीत येऊ, अशी शंका न घेता एकमेकांना साथ देत सर्वांनीच पुढे यायला हवे. आता नाही, तर कधीच नाही अशी स्थिती आहे. त्यामुळेच डीजेविरोधात सह्यांच्या मोहिमेत मोठ्या संख्येने नागरिकांनी सहभागी होण्याचे आवाहन सौरभ गोखले यांनी केले आहे.

 

स्वाक्षरी मोहिमेला प्रतिसाद मिळाल्यानंतर आम्ही लोकप्रतिनिधींपर्यंत पोहोचू. ढोल-ताशा, गणेश मंडळांनाही आम्ही सोबत येण्याचे आवाहन केले आहे. पुण्यापाठोपाठ ही मोहीम नंतर महाराष्ट्रात, देशात पोहोचवू, असाही विश्वास गोखले यांनी व्यक्त केला.