सिडको पंतप्रधान एकता मॉल उभारणार: राज्य सरकारची समिती स्थापन झाली

 

 

 

विविध राज्यांमधील आणि महाराष्ट्राच्या प्रत्येक जिल्ह्यातील वैशिष्ट्यपूर्ण उत्पादनांची एकाच छताखाली विक्री केली जावी यासाठी पंतप्रधान एकता मॉलची उभारणी केली जाणार आहे. या मॉलची उभारणी नवी मुंबईत उलवेमध्ये सिडकोमार्फत केली जाणार आहे. अनेकतेत एकता हा विचार समोर ठेवून पंतप्रधान नरेंद्र मोदी यांनी प्रत्येक राज्यात असा एक मॉल उभारला जावा, असे निर्दे श दिले होते. देशी उत्पादनांना हक्काची बाजारपेठ मिळावी, त्यातून राष्ट्रीय एकात्मता साधली जाईल आणि आर्थिक विकासही साध्य होईल. स्थानिक कारागीर, व्यावसायिक आणि उद्योजकांना हक्काचे व्यासपीठ मिळेल.

 

हा उपक्रम मेक इन इंडिया आणि आत्मनिर्भर भारत या संकल्पनांचा एक भाग आहे. मॉलमध्ये विविध राज्यांतील उत्पादनांचा एक, तर राज्यातील जिल्ह्यांतील उत्पादनांचा प्रत्येकी एक स्टॉल असेल. याच्या देखभालीसाठीचे धोरण राज्य सरकारची समिती तयार करेल. नगरविकास विभागाचे अतिरिक्त मुख्य सचिव समितीचे अध्यक्ष आहेत. सदस्यांमध्ये वित्त विभागाचे अतिरिक्त मुख्य सचिव, ग्रामविकास विभागाचे प्रधान सचिव, महिला व बालकल्याण विभागाचे प्रधान सचिव आणि सिडकोचे उपाध्यक्ष व व्यवस्थापकीय संचालक सदस्य आहेत.

 

उलवेमधील मॉलसाठी सिडकोने 5200 चौरस फूट जागाही निश्चित केली आहे. पंतप्रधान एकता मॉलच्या माध्यमातून पर्यटनालाही चालना मिळेल. मॉलच्या परिसरात सांस्कृतिक सभागृहांची उभारणी केली जाईल. देशभरातील कलावंत या ठिकाणी आपली कला सादर करतील. या मॉलमध्ये फूडकोर्टही असतील. मॉलच्या उभारणीसाठी केंद्र सरकार अर्थसाह्य करणार आहे.