सहकारी गृहनिर्माण संस्थांच्या मार्गदर्शनासाठी 22 आणि 23 मार्चला पुण्यात महाअधिवेशन
Total Views |
पुणे, 19 मार्च (आज का आनंद न्यूज नेटवर्क) :
पुणे जिल्हा आणि महाराष्ट्र राज्य सहकारी गृहनिर्माण संस्था आणि अपार्टमेंट्स महासंघ, सहकारी पतसंस्था महासंघ, सहकारी बँक महासंघ यांच्या वतीने महाराष्ट्रातील गृहनिर्माण संस्था आणि अपार्टमेंट्स यांना मार्गदर्शन व सहकार्य मिळावे, यासाठी पुण्यात महाअधिवेशन आणि प्रदर्शनाचे आयोजन करण्यात आले आहे. शनिवार 22 आणि रविवार दिनांक 23 मार्च रोजी सकाळी 10 ते 8 या वेळेत स्वारगेट येथील गणेश कला क्रीडा मंच येथे मेळावा आयोजित करण्यात आल्याची माहिती महासंघाचे अध्यक्ष सुहास पटवर्धन यांनी पत्रकार परिषदेत दिली.
सहकार मंत्रालय केंद्र आणि राज्य, महाराष्ट्र राज्य सहकारी बँक, पुणे व पिंपरी-चिंचवड महापालिका, पुणे आणि महाराष्ट्र राज्य सहकारी गृहनिर्माण संस्था महासंघ, पतसंस्था, बँका महासंघ, म्हाडा सिडको, रोटरी, लायन्स, एनएससीसी, अटल, पुणे पत्रकार संघ, क्रेडाई मेट्रो, ज्येष्ठ नागरिक संघ, महिला मंडळे, हास्य क्लब, विविध शैक्षणिक संस्था, विद्यार्थी आणि इतर समविचारी संघटनांच्या सहकार्याने आयोजन करण्यात आले आहे.
या मेळाव्यात सहकारी गृहनिर्माण संस्थांसाठी पुनर्विकसन, स्वयं- पुनर्विकसन, घनकचरा, ओलासुका कचरा व्यवस्थापन, ई-चार्जिंग सुविधा, अपारंपरिक ऊर्जा, सोसायट्यांचे खरेदीखत, मानीव हस्तांतरण, निवडणुका, तंटामुक्त सोसायटी, टँकरमुक्त संस्था, सहकार मित्र, सहकार संवाद, ऑनलाइन पोर्टल, बिगरशेती कर, सायबर क्राइम, सीसीटीव्ही, रेनवॉटर हार्वेस्टिंग, कृत्रिम बुद्धिमत्ता, सदनिका खरेदी-विक्री, संस्थांमधील पाळीव प्राणी, सहकारातील असहकार, उदासीनता इत्यादी विषयांवर चर्चासत्र, परिसंवाद आणि प्रदर्शन आयोजित करण्यात आले आहे; तसेच ग्रीन सोसायटी पुरस्कार आणि स्पर्धांचे आयोजनही करण्यात आले आहे.
म्हाडा, सिडको प्राधिकरण संबंधित सहकारी संस्थांच्या समस्यांवर विशेष सत्र घेतले जाणार आहे. पुणे आणि महाराष्ट्रातील सर्व सहकारी गृहनिर्माण संस्था, सोसायटीचे पदाधिकारी आणि सदस्यांनी तसेच समाजातील विविध घटकांनी या संधीचा लाभ घ्यावा, असे आवाहन आयोजकांनी केले आहे. अशाप्रकारे गृहसंस्था अपार्टमेंट्सविषयीच्या सर्व घटकांना एकत्र आणणारे देशातील नव्हे, तर जगातील पहिले महाअधिवेशन आहे.