मालमत्ताकर भरण्यासाठी नवी बीबीपीएस प्रणाली

 

 

नवी मुंबईकरांना मालमत्ताकर ऑनलाइन भरताना अनेक तांत्रिक अडचणींना सामोरे जावे लागते. त्यामुळे नागरिकांना नाहक मनस्ताप सहन करावा लागतो. या अडचणी सोडवण्यासाठी नवी मुंबई महापालिकेने ‌‘भारत बिल पेमेंट सिस्टीम' (बीबीपीएस) ही प्रणाली कार्यान्वित केली आहे. या प्रणालीत अत्याधुनिक तंत्रज्ञानाचा वापर करण्यात आला असून, ती पूर्णत: सुरक्षित आहे. या प्रणालीमुळे नागरिकांच्या वेळेची बचत होणार असशयाचे महापालिकेने स्पष्ट केले आहे. नवी मुंबईत साडेतीन लाखांहून अधिक नोंदणीकृत मालमत्ता आहेत. नागरिकांना मालमत्ताकर भरता यावा यासाठी महापालिकेने विभागीय कार्यालयांत सुविधा उपलब्ध करून दिल्या आहेत; तसेच ऑनलाइन कर भरण्याची सुविधाही उपलब्ध आहे. असे असले तरी नागरिकांना ऑनलाइन करभरणा करताना विविध अडचणींना सामोरे जावे लागत होते. त्यामुळे ऑनलाइन कर भरण्याबाबत नागरिकांमध्ये उदासीनता होती. ही बाब लक्षात घेत महापालिकेने आता भारत बिल पेमेंट सिस्टीम ही नवी मालमत्ताकर प्रणाली सुरू केली आहे.

 

या प्रणालीमुळे मालमत्ताधारकांना त्यांच्या मालमत्ताकराबाबतचा तपशील, थकीत रक्कम, कर भरण्याची अंतिम तारीख याबाबतची माहिती सहज उपलब्ध होईल. मालमत्ताधारकाची आर्थिक व व्यक्तिगत माहिती सुरक्षित राहणार असल्याचेही महापालिकेने स्पष्ट केले. मालमत्ताधारकांना एकाच क्लिकवर विविध प्रकारे मालमत्ताकर भरण्यासाठी सोय उपलब्ध झाली आहे. या प्रणालीमध्ये ऑनलाइन बँकिंग, यूपीआय, क्रेडिट कार्ड, डेबिट कार्ड, मोबाइल वॉलेट्स यासारखे विविध पर्याय उपलब्ध आहेत. नागरिक nmmc.gov.in या महापालिकेच्या संकेतस्थळावरून; तसेच माय एनएमएमसी या ॲपवरून घरबसल्याही करभरणा करू शकतात. कराचा भरणा केलेली पावती नागरिकांना तात्काळ उपलब्ध होणार आहे.

 

मालमत्ताधारकांना मालमत्ता करासंदर्भातील तक्रारींचा निपटारा, शंकांचे निरसन व मालमत्ताकराबाबतची माहिती मिळवण्यासाठी 022-62531727 हा विशेष मदत क्रमांक सुरू करण्यात आला आहे. नागरिकांनी सोमवार ते रविवारी सकाळी 10 ते सायंकाळी 6 पर्यंत या हेल्पलाइन क्रमांकावर संपर्क करून आपल्या तक्रारींचे निराकरण करून घेण्याचे आवाहन महापालिकेच्या मालमत्ताकर विभागाने केले आहे. मालमत्ताधारकांना करभरणा सहजपणे करता यावा व त्यांच्या वेळेची बचत व्हावी यासाठी या नव्या प्रणालीचा वापर मालमत्ताकर विभाग करणार आहे. जुन्या प्रणालीमधील सर्व त्रुटी दूर करण्याकडे विशेष लक्ष दिल्याने ऑनलाइन करभरणा प्रक्रिया अधिक सुलभ व जलद झाल्याचे आयुक्त डॉ. कैलास शिंदे यांनी सांगितले.