महिला स्टार्टअप योजनेत सहभागासाठी 5 ऑगस्टपर्यंत अर्ज करावेत : मंगल प्रभात लोढा

 

 

 

कौशल्य, रोजगार, उद्योजकता व नाविन्यता विभागांतर्गत कार्यरत असलेल्या राज्य नाविन्यता सोसायटीतर्फे प्रारंभिक टप्प्यातील महिला नेतृत्वातील स्टार्टअप्सना चालना देण्यासाठी पुण्यश्लोक अहिल्यादेवी होळकर महिला स्टार्टअप योजना सुरू करण्यात आली आहे. या योजनेसाठी 100 कोटींच्या निधीची तरतूद करण्यात आली असून, सुमारे 500 स्टार्टअप्सना 1 लाख ते 25 लाखांपर्यंत आर्थिक साह्य देण्यात येणार आहे. या योजनेत सहभागी होण्यासाठी इच्छुकांनी 5 ऑगस्टपर्यंत अर्ज करावेत, असे आवाहन कौशल्य विकास मंत्री मंगल प्रभात लोढा यांनी केले आहे.

 

राज्यातील होतकरू महिला नेतृत्वातील स्टार्टअप्सना पाठबळ देणे, महिला नेतृत्वातील प्रारंभिक टप्प्यातील स्टार्टअप्स व नाविन्यपूर्ण संकल्पना असलेल्या स्टार्टअप्सना व्यवसायवृद्धीसाठी एक वेळेस अर्थ साह्य करणे, महिला स्टार्टअप्सला स्वावलंबी व आत्मनिर्भर करणे व देशातील सर्वाधिक महिला स्टार्टअप्स असलेले राज्य म्हणून ओळख निर्माण करणे हे या योजनेचे मुख्य उद्दिष्ट आहे. या योजनेत सहभाग घेण्यासाठी अर्जासाठी इच्छुकांनी www.msins.in या संकेतस्थळाला भेट द्यावी, असे आवाहन लोढा यांनी केले आहे.