श्रीमंत भाऊसाहेब रंगारी गणपती ट्रस्ट गणेशोत्सवात कार्यक्रमांची रेलचेल

 

 

 

हिंदुस्थानातील पहिला सार्वजनिक गणपती श्रीमंत भाऊसाहेब रंगारी गणपती ट्रस्टच्या वतीने यंदा गणेशोत्सवात विविध पारंपरिक कार्यक्रमांबरोबरच सामाजिक उपक्रमांचे आयोजन करण्यात आले आहे. त्यात महिला आणि विद्यार्थ्यांच्या अथर्वशीर्ष पठणापासून तर रील्स स्पर्धा आणि आरोग्य शिबिर, नेत्रदान शिबिर अशा विविध उपक्रमांचा समावेश आहे. ट्रस्टचे विश्वस्त आणि उत्सवप्रमुख पुनीत बालन यांनी गणेशोत्सवातील दहा दिवसांच्या कार्यक्रमांची माहिती दिली. यामध्ये गणेश चतुर्थीला भव्य मिरवणुकीने या गणेशोत्सवाला प्रारंभ होईल. प्रसिद्ध तबलावादक पद्मश्री विजय घाटे यांच्या हस्ते सकाळी 11 वाजून 50 मिनिटांनी श्रींची प्राणप्रतिष्ठापना होणार आहे.

 

दुसऱ्या दिवसापासून शालेय विद्यार्थ्यांच्या भेटी तसेच अथर्वशीर्ष पठण होणार आहे. यामध्ये जवळपास तीन हजारांहून अधिक विद्यार्थी सहभागी होणार आहेत. गणेशोत्सवाच्या दहा दिवसांत विविध नामांकित शाळांचे विद्यार्थी बाप्पाच्या दर्शनासाठी येणार असून, भाऊसाहेब रंगारी वाड्याला भेट देऊन स्वातंत्र्य लढ्यात श्रीमंत भाऊसाहेब रंगारी यांनी दिलेले योगदान आणि सार्वजनिक गणेशोत्सवाची सुरवात यासंबंधीचा इतिहास समजून घेणार आहेत. गणेशभक्तांसाठी दि. 20 ते 26 सप्टेंबर या कालावधीत आरोग्य शिबिराचे आयोजन करण्यात आले आहे. या शिबिरात रक्त तपासणीपासून इतर अनेक तपासण्या करण्यात येणार आहेत; तसेच नेत्रदान शिबिराचेदेखील आयोजन करण्यात आले आहे.

 

याशिवाय पहिल्या आठवड्यात रील्स स्पर्धेचे आयोजन करण्यात आले असून, श्रीमंत भाऊसाहेब रंगारी गणपती, क्रांतिकारी भवनाचा इतिहास यांचे रील करणाऱ्यांना विविध बक्षिसे दिली जाणार आहेत. दि. 25 सप्टेंबरला महिलांचे अथर्वशीर्ष पठण होईल. यामध्ये जवळपास दोन हजार पाचशेपेक्षा अधिक महिला सहभागी होतील. त्याचबरोबर दि. 26 सप्टेंबरला सायं. 6 ते रात्री 8 या वेळेत मुंबईच्या प्रसिद्ध चिंतामणी ग्रुपचे लाइव्ह बेंजोवादन होईल. याशिवाय दहा दिवसांत विविध मान्यवरांच्या हस्ते रोज रात्रीची आरती होणार असून राजकीय, कला, क्रीडा आदी विविध क्षेत्रांतील मान्यवर बाप्पाच्या दर्शनासाठी आणि श्रीमंत भाऊसाहेब रंगारी भवनाला भेट देणार आहेत. अनेक भजनी मंडळेदेखील या उत्सवात सहभागी होणार आहेत. अनंत चतुर्थदशीला भव्य विसर्जन मिरवणुकीने या उत्सवाची सांगता होणार असल्याचे पुनीत बालन यांनी सांगितले.

 

 

 

सामाजिक दायित्वाच्या भावनेतून सुरू केलेल्या गणेशोत्सवाची परंपरा यापुढेही अशीच सुरू राहिली पाहिजे. याच भावनेतून यंदाच्या गणेशोत्सवात विविध कार्यक्रमांसह सामाजिक उपक्रमांचेही आयोजन करण्यात आले आहे. अधिकाधिक गणेशभक्तांनी यामध्ये सहभागी व्हावे, असे मी आवाहन करतो.