भेसळयुक्त खवा तयार करण्यासाठीचेसाहित्य आणि दोन टन बर्फी जप्त

 

 

 

 

सणासुदीच्या काळात मिठाईमध्ये भेसळ करणाऱ्यांवर पोलिस आणि अन्न व औषध प्रशासनाने (एफडीए) वॉच ठेवला आहे. पिंरगुट येथील उरवडे गावालगतच्या एका दुकानात भेसळयुक्त खव्यापासून बर्फी तयार करण्यात येत असल्याची माहिती मिळाल्यानंतर एफडीएच्या अधिकाऱ्यांनी छापा टाकला. या कारवाईत तब्बल 10 लाख 73 हजार रुपये किमतीचा कच्चा माल आणि सुमारे दोन टन भेसळयुक्त खव्यापासून तयार केलेली तयारी बर्फी जप्त करण्यात आली. पौड पोलिसांनी दिलेल्या माहितीनुसार, उरवडे येथील कृष्णा फूडस येथे मोठ्या प्रमाणावर मिठाई तयार करण्यात येते. या मिठाईसाठी प्रामुख्याने बर्फीसाठी भेसळयुक्त खवा वापरण्यात येतो. पोलिसांनी एफडीएच्या अधिकाऱ्यांना सोबत घेऊन बुधवारी कृष्णा फूड्‌‍सवर छापा टाकला.

 

प्राथमिक तपासणीदरम्यान खवा भेसळयुक्त असल्याचे निदर्शनास आल्याने भेसळयुक्त बर्फी, स्कीम मिल्क पावडर, वनस्पती आणि पामतेल असा एकूण 10 लाख 73 हजार 650 रुपयांचा साठा जप्त केला; तसेच सुमारे दोन टन तयार बर्फी जप्त केली. नियम-अटींचे पालन केले नसल्याचे तपासणीत आढळून आल्याने हा व्यवसाय बंद करण्याचा आदेश देण्यात आला. उपविभागीय पोलीस अधिकारी भाऊसाहेब ढोले, पोलीस निरीक्षक मनोजकुमार यादव यांच्या मार्गदर्शनाखाली ही कारवाई करण्यात आली. हा भेसळयुक्त खवा पिरंगुट परिसरातील गावात विक्रीसाठी नेण्यात येणार होता. मात्र पोलिसांनी त्याअगोदरच छापा टाकला आणि त्यांचे पितळ उघडे पाडले. सणासुदीचे दिवस असल्याने अनेक भेसळयुक्त पदार्थ बनवले जात असल्याने नागरिकांनी मिठाई खरेदी करताना काळजी घ्यावी, असे आवाहन करण्यात आले आहे.