स्वच्छ भारत अभियान, स्वच्छ पुणेसाठी महापालिका सक्रिय
कचरा जमा होण्याच्या ठिकाणी पर्यायी व्यवस्था, रस्ते दुभाजक धुण्यास सुरुवात
Total Views |
पुणे, 7 डिसेंबर (आज का आनंद न्यूज नेटवर्क) :
स्वच्छ भारत अभियानांतर्गत कचरा निर्मूलन करण्यासाठी महापालिका ॲक्शन मोडवर आली आहे. दंडात्मक कारवाई वाढली असतानाच शहरात कचरा जमा होणारी ठिकाणे शोधून, तेथे पर्यायी व्यवस्था नागरिकांना उपलब्ध करून दिली जाणार आहे. तसेच थुंकीबहाद्दरांमुळे अस्वच्छ झालेले रस्ता दुभाजक जेटिंग मशीनच्या सहायाने धुण्यास सुरुवात केली गेली आहे. देशात सर्वात स्वच्छ व सुंदर शहर असलेल्या इंदूर शहरात केल्या जाणाऱ्या उपाययोजनांमधील काही उपाययोजना पुणे महापालिका देखील आता अमलात आणणार आहे. या दृष्टीने आता प्रशासकीय कामकाजात सुधारणा आणण्याकरिता घन कचरा व्यवस्थापन विभागाच्या निरीक्षकांचे प्रशिक्षण सुरु केले आहे. तसेच पान, गुटखा, मावा, तंबाखू खाऊन रस्त्याच्या दुभाजकावर थुंकल्यामुळे शहराच्या सौंदर्याला बाधा येत आहे. जी 20 परिषदेच्या निमित्ताने महापालिकेने शहरातील अनेक रस्त्यांवरील दुभाजकांची रंगरंगोटी केली होती.
त्यानंतर लगेच थुंकीबहाद्दारांनी रंगरंगोटी खराब केल्याचे दिसून आले होते. यातून मार्ग काढण्यासाठी आता महापालिकेने जेटिंग मशीनच्या सहाय्याने दुभाजक धुण्याचा निर्णय घेतला आहे. प्रत्येक क्षेत्रीय कार्यालयास उपलब्ध करून देण्यात आलेल्या जेटिंग मशीनचा वापर केला जाणार आहे. शिवाजीनगर- घोले रस्ता क्षेत्रीय कार्यालयाने मंगळवारी रात्रीपासून गणेशखिंड रस्ता, सेनापती बापट रस्ता, फर्ग्युसन रस्त्यावरील दुभाजक धुवून काढण्यास सुरुवात केली आहे. उर्वरित क्षेत्रीय कार्यालयांकडून देखील याची अंमलबजावणी केली जाणार आहे. दुभाजक धुण्यासाठी सांडपाणी प्रक्रिया केंद्रातील पाण्याचा वापर केला जाणार आहे, असे घनकचरा व्यवस्थापन विभागाचे प्रमुख संदीप कदम यांनी सांगितले.
शहरात कचरा साठण्याची ठिकाणे शोधण्याचे काम हाती घेण्यात आले आहे. ही ठिकाणे शोधून त्या ठिकाणी महापालिकेचा कर्मचारी नियुक्त केला जाणार आहे. सदर कर्मचारी हा संबंधित नागरिकांना कचरा टाकू नका असे आवाहन करेल, तसेच ती व्यक्ती कोणत्या भागात आहे, तेथे कचरा गोळा करण्यासाठी काय यंत्रणा आहे, यंत्रणेचा वापर का करीत नाही, कचरा गोळा करणारे वाहन येत नाही का, अशी विविध प्रकारची माहिती कर्मचारी गोळा करेल. त्याच वेळी संबंधित क्रॉनिक स्पॉटच्या ठिकाणी कचरा टाकणाऱ्यांना पर्यायी व्यवस्था उपलब्ध करून देण्यासाठी प्रयत्न करेल. अशा प्रकारे हे क्रॉनिक स्पॉट कमी करण्यात येणार आहे. इंदूर महापालिकेनुसार घनकचरा व्यवस्थापन विभागाने फिरती पथके निर्माण करण्याचा निर्णय घेतला आहे.
यासाठी चार चाकी चार वाहने खरेदी केली जाणार आहेत. या वाहनातील निरीक्षक हे सार्वजनिक ठिकाणी कचरा टाकणाऱ्यांवर दंडात्मक कारवाई करणार आहे. या वाहनांना पांढरा आणि पिवळा रंग दिला जाईल. तसेच या वाहनांवरून नागरिकांना स्वच्छतेचे आवाहन केले जाणार आहे. घन कचरा व्यवस्थापन विभागाच्या 450 कर्मचाऱ्यांना वॉकीटॉकी देण्यात येणार आहे. यामुळे कचरा निर्मूलनाचे काम करण्यासाठी कर्मचाऱ्यांमध्ये संपर्क निर्माण करण्यास मदत होणार आहे.