समाजासाठी कार्य करण्याची आवड असल्यास समाजसेवक म्हणून करिअर घडवता येईल. समाजसेवक म्हणून काम करताना गरिबी, बेरोजगारी, सार्वजनिक स्वच्छता, कुपोषण, दारूचे व्यसन, पर्यावरण, प्रदूषण, ड्रग्ज, जंगलतोड, ज्येष्ठ नागरिक, तसेच अपंग, गतिमंद, विशेष व्यक्ती आदी विविध स्तरांवर काम करावे लागते.
कामाचे स्वरूप : विविध स्तरांतील लोकांशी बोलणे, त्यांच्या समस्या समजून घेणे, या लोकांना काही विशिष्ट गोष्टींबाबत प्रशिक्षित करायचे असल्यास विविध कार्यक्रमांचे आयोजन करणे आणि त्यांना प्रशिक्षण देणे, बदल घडून येण्यासाठी सरकारी आणि खासगी क्षेत्रातील व्यक्तींशी सलोख्याचे संबंध प्रस्थापित करणे, सामाजिक प्रश्नाबद्दल जनजागृती घडवून आणण्यासाठी शिबिरे, व्याख्याने, शैक्षणिक कार्यक्रम आयोजित करणे आदी गोष्टी समाजसेवक म्हणून काम करणाऱ्या प्रत्येक व्यक्तीच्या दैनंदिन जीवनाचा भाग असतात.
पर्यावरणासाठी काम करणारे समाजसेवक
शैक्षणिक पात्रता : या क्षेत्रात करिअर करण्यासाठी नामांकित संस्थेतून बीएसडब्ल्यू किंवा एमएसडब्ल्यूची पदवी आवश्यक आहे.
नोकरीच्या संधी : एनजीओ, बालगुन्हेगारांना सुधारण्यासाठी असलेल्या शाळा आणि संस्था, रुग्णालये, क्लिनिक्स, रिहॅबिलिटेशन सेंटर, तुरुंग, सरकारी आणि खासगी क्षेत्रातील रूरल आणि कम्युनिटी डेव्हलपमेंट सेंटर,सामाजिक आणि चॅरिटेबल काम करणारे सहकारी आणि सार्वजनिक कल्याण (कॉऑपरेटिव्हज अँड पब्लिक वेल्फेअर) ट्रस्ट, महिला आणि बाल कल्याण तसेच कुटुंब नियोजन यासाठी काम करणाऱ्या संस्था, शारीरिक आणि मानसिक अपंगांसाठी काम करणाऱ्या संस्था,सरकारी पातळीवर सामाजिक विषयांवर काम करणारे राज्य आणि केंद्र सरकारचे समाज कल्याण खाते, अंधांच्या शाळा, कुटुंब कल्याण केंद्र इत्यादी.
यात करू शकता स्पेश्यलायझेशन :
सायकिअ‍ॅट्रिक सोशल वर्कर (मानसिक समाजसेवक)
फॅमिली अँड चाइल्ड वेल्फेअर वर्कर (कुटुंब आणि मुलांच्या कल्याणासाठी काम करणारे समाजसेवक)
अर्बन अँड रूरल कम्युनिटी डेव्हलपमेंट वर्कर (शहरी आणि ग्रामीण समाजाच्या विकासासाठी काम करणारे समाजसेवक) क्रिमिनॉलॉजी अँड करेक्शनल अ‍ॅडमिस्ट्रिशन वर्कर (गुन्हेगारी आणि सुधारणा/प्रतिबंध प्रशासकीय समाजसेवक)
लेबर वेल्फेअर अँड इंडस्ट्रिअल रिलेशन्स वर्कर (कामगार कल्याण आणि औद्योगिक हितसंबंध जपणारे समाजसेवक)