बोन मॅरो ट्रान्सप्लँट या उपचारात रोगग्रस्त पेशींची जागा निरोगी पेशी घेतात बोन मॅरो म्हणजे हाडांमध्ये असणाऱ्या मांसल पेशी. त्यांच्यापासून रक्तपेशी तयार होतात रोगप्रतिकारक पांढऱ्या पेशीही त्यापासून तयार होतात रक्तप्रवाह सुरळीत करण्यास बोन मॅरो ट्रीटमेंट उपयुक्त ठरते.
हरोशिमा आणि नागासाकीवर अमेरिकेने अणुबाँब टाकल्याने लाखो जपानी नागरिकांचा जागीच मृत्यू झाला. या बाँबस्फोटातून वाचलेल्यांचीही मरणाकडे वाटचाल चालू झाली. त्यांचे जगणे वेदनामय ठरले. काही जण काही महिन्यांनी, तर काही जण काही वर्षांनी यातना सहन करत मृत्युमुखी पडले. मृतांचा आकडा वाढत गेल्यावर डॉक्टरांनी किरणोत्सर्ग वा रॅडिएशनच्या परिणामांचा अभ्यास करण्यास सुरुवात केली. रॅडिएशनची शिकार ठरलेला रुग्ण बोन मॅरोमुळे वाचू शकतो, याचा शोध त्यातून लागला.
दुसऱ्या महायुद्धापूर्वी रॅडिएशनच्या केसेस दुर्मीळ होत्या. यामुळे डॉक्टरांना रुग्णांवर उपचार करण्याचा अनुभव नव्हता. मॅनहटन प्रोजेक्ट अंतर्गत वैज्ञानिकांनी उंदीर आणि इतर प्राण्यांवर किरणोत्सर्गाचा काय परिणाम होतो, याचा अभ्यास सुरू केला. निरोगी उंदराच्या बोन मॅरोचे प्रत्यारोपण केल्यास किरणोत्सर्गाने ग्रस्त उंदराचे प्राण वाचू शकतात, असे डॉ. एगॉन लॉरेंत्झ यांना आढळून आले. या संशोधनातूनच बोन मॅरो ट्रान्सप्लांटची सुरुवात झाली. सध्या ल्युकेमियासह (रक्ताचा कर्करोग) अनेक गंभीर आजारांवर बोन मॅरो ट्रीटमेंट अत्यंत परिणामकारक ठरते आहे. यामुळे तिचा वाढत्या प्रमाणात उपयोग केला जात आहे.