पुणे परिमंडलात स्मार्ट मीटरला वाढता प्रतिसाद

 

 

पुणे, 21 जुलै (आ.प्र.) : महावितरणतर्फे राबवण्यात येत असलेल्या स्मार्ट मीटर माेहिमेला पुणे शहरात आणि परिसरात ग्राहकांकडून सकारात्मक प्रतिसाद मिळत आहे. ग्राहकांच्या मनातील शंकांचे निरसन करण्यासाठी महावितरणचे अधिकारी व कर्मचारी विविध साेसायट्यांत जाऊन थेट मेळावे घेत आहेत. या जनजागृतीमुळे पुणे परिमंडलात एकूण 14 लाख 13 हजार 193 स्मार्ट मीटर बसवण्यात आले आहेत.

 

स्मार्ट मीटरच्या जनजागृतीसाठी मुख्य अभियंता सुनील काकडे यांनी मंडलनिहाय पूर्णवेळ पथके तयार केली आहेत. प्रत्येक पथकात दाेन अभियंत्यांसह 5 जणांचा समावेश असून, ही पथके माेठमाेठ्या साेसायट्यांमध्ये जाऊन तेथील सभासंदांना एकत्र करून स्मार्ट मीटरचे फायदे समजावून सांगत आहेत. त्यांच्या विविध प्रश्नांना उत्तरे देऊन त्यांचा गैरसमज दूर करत आहेत. एका आठवड्यात या पथकांनी सुमारे 200 ठिकाणी मेळावे घेऊन 40 हजारांहून अधिक वीज ग्राहकांची जनजागृती केली आहे; तसेच दाेन चित्ररथही गर्दीच्या ठिकाणी स्मार्ट मीटरबाबत जनजागृती करत आहेत.