मराठी भाषा संवर्धनासाठी प्रभावी कृती आराखडा राबवा : मुख्यमंत्री फडणवीस

मराठी भाषा, साहित्य आणि बाेलींच्या जतन आणि संवर्धनासाठी प्रभावी कृती आराखडा तयार करून त्याची अंमलबजावणी करावी. तसेच राज्य मराठी विकास संस्थेच्या कामकाजात सातत्य, पारदर्शकता आणि परिणामकारकता येण्यासाठी वर्षभरातील सर्व वैधानिक बैठकींचे वेळापत्रक आगाऊ निश्चित करावे, असे निर्देश मुख्यमंत्री देवेंद्र फडणवीस यांनी दिले. सह्याद्री अतिथीगृहात मुख्यमंत्र्यांच्या अध्यक्षतेखाली राज्य मराठी विकास संस्थेच्या नियामक मंडळाची बैठक झाली. मराठी भाषा मंत्री उदय सामंत, मराठी भाषा विभागाचे सचिव डाॅ. किरण कुलकर्णी, राज्य मराठी विकास संस्थेचे संचालक डाॅ. श्यामकांत देवरे, साहित्य संस्कृती मंडळाचे अध्यक्ष डाॅ. सदानंद माेरे, भाषा संचालक अरुण गीते; तसेच राज्य मराठी विकास संस्थेचे अशासकीय सदस्य प्रत्यक्ष व ऑनलाइन बैठकीस उपस्थित हाेते.