पुणेकरांनी पुनीत बालन ग्रुपच्या डीजेमुक्त दहीहंडीचा थरार अनुभवला

 

 

 

गोविंदा रे गोपाळा...चा जयघोष, ढोल- ताशांचा मंगलमय गजर, महाकाल नृत्य आणि मुंबईतील प्रसिद्ध वरळी बिट्‌‍स यांच्या पारंपरिक संगीतावर थिरकणाऱ्या तरुणाईचा उसळलेला जनसागर... अशा उत्साही वातावरणात पु- नीत बालन ग्रुपतर्फे आयोजित 26 सार्वजनिक मंडळांच्या संयुक्त दहीहंडीचा थरार पुणेकरांनी अनुभवला. ऐतिहासिक लाल महाल चौकात शनिवारी (16 ऑगस्ट) रात्री तुडुंब गर्दीसमोर राधेकृष्ण ग्रुपने सात थर रचत ही संयुक्त दहीहंडी फोडण्याचा बहुमान मिळवला. विशेष म्हणजे महाराष्ट्रातील पहिली डीजेमुक्त दहीहंडी साजरा करीत एक नवा आदर्श या निमित्ताने पुनीत बालन ग्रुपने लोकांसमोर ठेवला.

  

पुण्यातील 26 सार्वजनिक मंडळांनी एकत्र येऊन पुनीत बालन ग्रुपच्या माध्यमातून हा संयुक्त दहीहंडी उत्सव सुरू केला आहे. या वर्षीची संयुक्त दहीहंडी डीजेमुक्त साजरी करण्याची घोषणा पुनीत बालन यांनी केली होती. त्यामुळे या डीजेमुक्त दहीहंडीबद्दल पुणेकरांच्या प्रतिसादाबाबत उत्सुकता होती. मात्र, ढोल-ताशांचा गजर आणि वरळी बिट्‌‍सच्या संगीतावर हजारो पुणेकरांनी ठेका धरला आणि डीजेमुक्त दहीहंडीचा प्रयोग यशस्वी करत एक नवीन पायंडा पाडला. प्रभात बँडच्या सुमधुर वादनाने या दहीहंडी कार्यक्रमाची सुरुवात झाली. युवा वाद्यपथक, समर्थ पथक, रमणबाग आणि शिवमुद्रा या ढोल पथकांच्या जोरदार वादनाने या कार्यक्रमाची रंगत वाढली आणि वरळी बिट्‌‍स बँडने केलेल्या वादनाने अवघे वातावरण गोविंदामय होऊन गेले.

 

दहीहंडीच्या सलामीकरिता वंदे मातरम दहीहंडी संघ, नटराज संघ, म्हसोबा संघ, भोईराज संघ, गणेश मित्र मंडळ संघ, गणेश महिला गोविंदा पथक, गणेश तोफखाना दहीहंडी संघ, नवज्योत ग्रुप संघ, इंद्रेेशर संघ (इंदापूर), शिवकन्या गोविंदा पथक (चेंबूर-मुंबई), शिवतेज ग्रुप, दहीहंडी संघ यांसारख्या अनेक गोविंदा पथकांनी मोठ्या उत्साहात सहभाग घेतला. रात्री पावणेदहा वाजता राधेकृष्ण ग्रुपने सात थर रचत ही ऐतिहासिक दहीहंडी फोडण्याचा मान मिळविला. या वर्षीच्या दहीहंडी उत्सवाचे विशेष आकर्षण म्हणजे उज्जैन येथील पारंपरिक ‌‘शिव महाकाल‌’ पथक होते. या पथकाच्या तालावर नाचत तरुणाईने जल्लोष केला. कार्यक्रमाला अभिनेता-दिगदर्शक प्रवीण तरडे, अभिनेता हार्दिक जोशी, मराठी बिग बॉसफेम इरिना यांच्यासह अनेक मराठी कलाकारांनी या उत्सवाला हजेरी लावली.

 

डीजेमुक्त दहीहंडी उत्सव यशस्वी केल्याबदल आभार पुणेकरांनी डीजेमुक्त दहीहंडीला उस्फूर्त प्रतिसाद देत हा उत्सव यशस्वी केल्याबदल मी मनापासून आभार व्यक्त करतो. गेल्या वर्षी आम्ही वाहतूक कोंडी टाळण्यासाठी आणि पोलिसांवरील ताण कमी करण्यासाठी सार्वजनिक मंडळांची संयुक्त दहीहंडी उत्सव सुरू केला होता. या वर्षी डीजेमुक्त गणेशोत्सवाचा संकल्प केला असून, त्याच भूमिकेतून दहीहंडीमध्ये डीजेचा वापर टाळण्यात आला. त्यामुळे ध्वनी प्रदूषण कमी झाले आणि पारंपरिक वाद्यवादकांनाही रोजगार मिळाला.

-पुनीत बालन (अध्यक्ष, पुनीत बालन ग्रुप)