दगडूशेठ मंदिराला अंगारकीनिमित्त आकर्षक सजावट
Total Views |
पुणे, 13 ऑगस्ट (आ.प्र.) :
गणपती बाप्पा मोरया... मंगलमूर्ती मोरया...ओम गं गणपतये नमः... अशा गणेश नामाच्या जयघोषाने दगडूशेठ गणपती मंदिराचा परिसर दुमदुमून गेला. अंगारकी संकष्टी चतुर्थी योग असल्याने भाविकांनी दगडूशेठ गणपतीच्या दर्शनासाठी पहाटेपासूनच मोठी गर्दी केली. मंदिराच्या कळसापासून ते गाभाऱ्यापर्यंत विविधरंगी फुलांनी केलेली आकर्षक सजावट आणि विद्युत रोषणाने संपूर्ण दगडूशेठ हलवाई गणपती मंदिर उजळून निघाले.
श्रीमंत दगडूशेठ हलवाई सार्वजनिक गणपती ट्रस्ट, सुवर्णयुग तरुण मंडळाच्या वतीने अंगारकीनिमित्त गणपती मंदिरात पहाटे स्वराभिषेकाचे आयोजन करण्यात आले. यावेळी प्रख्यात गायक कुणाल गांजावाला यांनी गायनसेवा दिली. त्यापूर्वी ब्रह्मणस्पती सूक्त अभिषेक झाला. स्वराभिषेकानंतर गणेशयाग व विविध धार्मिक कार्यक्रम पार पडले. मंदिरावर केलेल्या पुष्पसजावटीत शेवंती, झेंडू, गुलाब, लिली, ऑर्केडसह विविध फुलांचा समावेश होता. याशिवाय गाभाऱ्यातही पुष्पसजावट करण्यात आली होती. पहाटे 3 पासून दर्शनासाठी मंदिर खुले ठेवण्यात आले होते. त्यामुळे भाविकांनी पहाटेपासूनच मोठ्या संख्येने गर्दी केली. श्री तांबडी जोगेश्वरी मंदिर रस्ता, अप्पा बळवंत चौकाच्यापुढे भाविकांच्या रांगा लागल्या होत्या.