बेल्जियममध्ये दगडूशेठ गणपतीची प्रतिष्ठापना होणार
महाराष्ट्र मंडळाने पुढाकार घेतला : गणेशोत्सवासाठी मूर्ती सुपूर्त करण्यात आली
Total Views |
पुणे, 11 ऑगस्ट (आ.प्र.) :
गणपती बाप्पा मोरया... मंगलमूर्ती मोरया...च्या जयघोषासह श्रीमंत दगडूशेठ गणपती की जय...चे स्वर आता थेट बेल्जियममध्ये निनादणार आहेत. महाराष्ट्र मंडळ बेल्जियम आणि शिरीष वाघमारे यांच्या पुढाकाराने बेल्जियममधील गणेशोत्सवात यंदा प्रथमच श्रीमंत दगडूशेठ हलवाई गणपतीच्या प्रतिकृतीची प्रतिष्ठापना करण्यात येणार आहे. ही मूर्ती पुण्यातील मंदिरात विधिवत पूजन करून नुकतीच महाराष्ट्र मंडळ बेल्जियमच्या सदस्यांकडे सुपूर्त करण्यात आली.
यावेळी उपक्रमाचे संयोजक शिरीष वाघमारे, तृप्ती वाघमारे, ट्रस्टचे कोषाध्यक्ष महेश सूर्यवंशी, राजाभाऊ पायमोडे, रोहित लोंढे आदी उपस्थित होते. ‘श्रीं’च्या मूर्तीची उंची अडीच फूट असून, पुण्यात ही मूर्ती सुभाषनगरमधील श्री नटराज आर्टचे भालचंद्र उर्फ लाला देशमुख व राजेंद्र देशमुख यांनी साकारली आहे. शिरीष वाघमारे, तृप्ती वाघमारे यांच्यासह इतर सदस्यांनी ही मूर्ती स्वीकारली. श्रीमंत दगडूशेठ हलवाई गणपती बाप्पाचे बेल्जियममध्ये आगमन हा महाराष्ट्र मंडळ बेल्जियमचा अभिमानाचा क्षण आहे. यामुळे परदेशांत राहणारे भारतीय आणि महाराष्ट्रीय बांधवांना गणेशोत्सवाचा आनंद घेता येणार असून, या निमित्ताने श्रद्धा आणि संस्कृती थेट महाराष्ट्रातून बेल्जियममध्ये पोहोचणार आहे.
बाप्पाची बेल्जियममधील स्थापना आमच्यासाठी श्रद्धा, परंपरा आणि एकतेचे प्रतीक ठरणार आहे, असे वाघमारे यांनी सांगितले. श्रीमंत दगडूशेठ हलवाई गणपती हे जगभरातील गणेशभक्तांचे श्रद्धास्थान आहे. बेल्जियममधील गणेशभक्तांची अपार श्रद्धा श्रीमंत दगडूशेठ हलवाई गणपतीवर असल्याने ‘श्रीं’ची मूर्ती त्यांना देण्यात आली आहे. जवळपास अडीच हजार मराठी बांधव तेथे सक्रिय आहेत; तसेच 20 ते 25 हजार भारतीय नागरिक उत्सवात सहभागी होतात. लोकमान्य टिळकांची समाज एकसंध होण्याची भावना, भारतासह परदेशातही घडत आहे, याचा आनंद असल्याचे सूर्यवंशी यांनी सांगितले.